தினமொரு முறை காதல் சொல்

காதலுற்றதால் வரும்
துயரை விட
அதைச் சொல்லில்
வடிப்பதே பெரும்
வேதனையூட்டுதடி

அத்தனை வலி தாங்கியும்
அனுதினமும்
காரணம் பல்லாயிரம்
சொல்வேன்
கண்மணி மேல்
காதல் வர

அதில் ஒன்றேனும்
ஓர் முறை சொல்டி
என்னிடத்தில் நீ
காதல் கொள்ள

நிற்பதற்கும் நேரமின்றி
நிரம்பி நிற்கும்
உன் நாட்குறிப்பில்
எனக்கென
சில மணித்துளி
தரமாட்டாயா

திருமகள் திருமுகம்
எளியவன்
திசை பாராதா

கண்ணில் தெரியும்
உன் காதல்
சொல்லில் வாராதா

பாலைப் பெருநிலம் கடக்கும்
வறியவன் நான்
கானல் காட்சியென
உன் காதல் தெரியுதடி

குவளையில் நீர் உண்டென
அறிந்தென்ன பயன்
அடித் தொண்டை
நனையும் வரை

தணல் வெப்பத்தில் காய்ந்தும்
கண்ணீரில்  தோய்ந்தும்
நிதம் மனம் நோகுதடி

உன் செவ்வாய்
மலர்ந்து‌ ஒவ்வோர்
நாளும் காதல் சொல்லடி
உலரும் என் உயிர்
சிறு துளிர் விடும்.

முத்தங்கள் குறித்து

நெற்றியில் தொடங்கி
மோவாயில் முடிக்கிறேன்

இமைகளும் கன்னங்களும்
உனக்கு இரண்டென
முத்தக் கணக்கிட்டே
அறிகிறேன்

உனைக் காணாத
பொழுதுகளின்
கடன் மிச்சம்
முத்தங்களால்
கட்டித் தீர்க்கிறேன்

பரிகாசம் செய்யும்
உன் இதழ்களை
முத்தச் சிறையிலடைக்கிறேன்

முத்தங்கள் முடிந்த பின்
ஓராயிரம் கேள்விகள் கேட்கிறாய்

விடை எதுவென
விழி பிதுங்கி நிற்கையில்
எல்லா கேள்விகளுக்கும் முத்தங்களே பதில் என்கிறாய்

தவறான விடைகளுக்கு
தண்டனை இரட்டிப்பு
முத்தங்கள் என்கிறாய்

வாய் வலிக்க
பதில் சொல்லி
தலைசுற்றி நிற்கிறேன்

நான் விட்ட இடத்திலிருந்து
நீ மீண்டும்
துவங்குகிறாய்

அன்பின் அளவுகோல்
முத்தமே என்றால்
நம் காதல்
அலைகடலினும் பெரிதென
சிவக்கிறாய்.